الوهابية في الموسيقى العربية

من أعظم القصائد في تاريخ الشعر العربي الحديث قصيدة أمير الشعراء أحمد شوقي (مضناك جفاه مرقده) واللي كتبها علي نهج قصيدة الشاعر الاندلسي الحصري القيرواني اللي مطلها بيقول..

ياليل: الصب متى غده؟؟...........أقيام الساعة موعده؟
رقد السمار فأرقــــه...............أسف للبين يردده

قصيدة القيرواني عبقرية وقصيدة شوقي عبقرية ولحن محمد عبد الوهاب للقصيدة عبقري..من الاخر هي أغنية من درر الغناء العربي..وفيها سر يخليك تستمتع بأي شخص بيغنيها عبد الوهاب - فيروز - انغام - خالد سليم..سمعتها بصوتهم واستمتعت بها جدا..

من فترة وقع في ايدي البوم غنائي من انتاج شركة بيراميدا عنوانه (سهرة مع التخت الشرقي)..اسم الالبوم شجعني وخصوصا لما قريت أسامي مجموعة الأغاني اللي فيه ولقيتها مجموعة متميزة جدا كما هو واضح في الصورة..شغلت الأغاني وسمعت أول أغنية وحسيت من طريقة الأداء ونوع التسجيل كده أنه متسجل من احدى حفلات الموسيقى العربية (ده مجرد تخمين مش أكتر)..المغني صوته وأداءه كانوا معقولين لأغنية كارم محمود (أمانة عليك ياليل طول)..قلت حلو الألبوم شكله مشجع..مقدرتش أمسك نفسي وعلى طول توجهت لأغنيتي الأثيرة (مضناك) لتبدأ المفاجأت..التسجيل أولا بدون صوت كورال وده غريب على الأغنية اللي صوت الكورس من أهم عناصرها..المغني صوته غريب جدا والأنيل أن هو والعازفين كانوا بيأدول الأغنية باستخدام تيمبو بطيء جداااا لدرجة الملل (خصوصا أن الأغنية اصلا مش سريعة عشان تسمح بكده)..لحد هنا وأنا مكبر دماغي عادي وباقول لنفسي الاغنية صعبة والقصيدة صعبة وكتر خيرهم أنهم حاولوا فيها..لحد ما حدثت اللطمة الكبري بقى اللى افقدتنى أعصابي!!

أعظم جزء من القصيدة في وجهة نظري وباعتبره من اعظم ما كتب في الحب قول شوقي:

بيني في الحب وبينك مالا......يقدر واش يفسده
ما بال العاذل يفتحلي......باب السلوان واوصده
ويقول تكاد تجن به........فأقول واوشك اعبده!

شفت العظمة؟؟ بيحب حبيبته لدرجة مش ممكن كلام الواشي أو العاذل يقلل منها..لدرجة ان اللى بيجي يضرب اسفين ويقوله دانت قربت تتجنن بيها يفاجأ برد معجز: لا انا مش بس هاتجنن بيها دانا هاعبدها!!..شعر مبهر من شاعر مبهر..ولكن...

صناع الألبوم بقي استخدموا عقلية رجل البادية ..العقلية الوهابية اللى مصرة على محاسبة الفن بالقطعة والوقوف على الكلمة ومعجبهومش قول شوقي (فاقول واوشك اعبده) فاذا بالأخ المطرب المجهول يغيرها منه لنفسه كده إلى (فاقول واوشك اعشقه)!!!

التعديل البسيط ده يحمل عدة كوارث للي يحب يفكر فيه..

أولا ده تعدي صارخ على نص من درر الشعر العربي..نص لأمير الشعراء مكتوب من سنين السنين والكل شهد بروعته..والراجل مات وساب النص..مش من حق حد يعدل فيه لفظيا ولا فكريا..دى لو اغنية كلمات بهاء الدين محمد كان لازم يستأذنوه في تغيير الكلام..مش يغيروا كلام شوقي!!!

ثانيا ده اغتيال لروعة النص وهدم للمعنى من أساسه..ودليل انهم مش فاهمين اصلا معنى الكلام..يعني ايه ويقول تكاد تجن به فاقول واشك اعشقه؟؟ ماهو طبيعي ان العشق سابق للجنون..ولا هو أى حاجة وخلاص بتتقال وكان النص الاصلى (جيتي انتى بسرعة يابنت الايه)!!

ثالثا التغيير بوظ القافية اللى ماشيه بطول القصيدة (مشتملة الابيات التى لم يلحنها عبد الوهاب) على الالف والدال..لكن بسلامته المطرب الشرعي اختار ان يخليها الف وقاف..حمار بيغني!!

رابعا وهو الاهم..ليه بقى؟ لصالح مين؟ يعنى الواحد طول عمره متعود يقولوا على الفن حرام..وعلى نزار قباني فاسق بتاع نسوان مارسيل خليفة كافربيغني قصة سيدنا يوسف ويوسف شاهين ابن جزمة بيعملها فيلم سينما..لكن كان مجرد رأي بيحاولوا يفرضوه..ليه بقى الموضوع يتحول من رأي لممارسة؟ وليه أصلا يغني القصيدة وهو شايف أن كلامها حرام؟ طيب ما يفكه منها ويغنى تمللي معاك!!..وبعدين اصلا ده واحد من انكر الاصوات بيغنى وعازفين مش فاهمين اللحن والحاجة الوحيدة الباقية كانت الكلمات..يعنى هم قدموا اغنية افسدوا كل عناصرها باقتدار الكلام واللحن والصوت والكورس!!

خلاصة الكلام انى متنرفز ومش عارف افش غلي في مين عشان الالبوم معلهوش اسم يوحد ربنا نعرف منه مصدره غير اسم المنتج (ريتشارد الحاج) ولذلك هاوجه كلامي للحاج ريتشارد..ياعم الحاج..بيقولوا الشعر حرام واني اكاد اجن به..فارد عليم واقول واوشك اعبده..وطظ في سعادتك

ماسورة السيت كوم التي انفجرت

أنا واحد من أبناء جيل التسعينات الغلبان المعدوم الرموز..الجيل اللى لم يجد لنفسه ما يميزه سينيمائيا ولا موسيقيا ولا ادبيا ولا حتى على صعيد اللبس والموضة!!..بس جيلي دخل بعض مفردات وعادات للشارع المصري منها مسلسلات (السيت كوم) وهي لمن لا يعرف اختصار لسيتويشن كوميدي او كوميديا الموقف وهى مصطلح وارد امريكا اللى بيميزوا بيه هذا النوع من الكوميديا عن الستاند اب كوميدي وهي كوميديا القاء النكات والسكيتش كوميدي واللى بتتغير فيه الشخصيات والبيئات من حلقة لاخري عكس السيت كوم اللى بتكون فيه الشخصيات محددة الهوية والبيئة والعلاقات اللى بينها مع خلق حكاية جديدة لهذه الشخصيات كل حلقة

جيلنا عرف السيت كوم من المحطات العربية اللى كانت بتبثها وكنا بنتفرج ونضحك ونعجب بحياة الامريكان..كبرنا واحنا بنتابع فريندز وسينفيلد وسابرينا وفريزر..وشفنا بعض المحاولات المصرية لعمل سيت كوم كلها تقريبا كان فيه قدر كبير من عدم الحرفية والاستظراف ولم يلاقي النجاح المطلوب زي شباب اونلاين والجراج مثلا..لحد ما انضربت قنبلة (تامر وشوقية) اللى شفنا فيه لاول مرة شخصيات مرسومة جيدا وكتاب عارفين حرفة كتابة مسلسل سيت كوم والناس حبت المسلسل ونجح نجاح مدوي (رغم ان تيمة المسلسل مقتبسة بنسبة كبيرة من مسلسل دارما وجريج لكن بصراحة مقتبسة بتمصير مميز جدا)..بعدها اتى مسلسل جيد وناجح ايضا هو (راجل وست ستات) ونال نجاح معقول ضمن له الاستمرار للموسم الثالث زي تامر وشوقية بالظبط

المهم بقى انى بافتح الجرنان لقيت اعلانات القنوات المصرية والعربية لبرامج رمضان..وفوجئت بكمية هائلة من مسلسلات السيت كوم هاتتعرض فى رمضان..وانا بصراحة متابع جيد للنوعية دى رغم انى مش من محبي التليفزيون ولكن باحس فيها بنوع من الحنين لايام الاعدادى والثانوي..لكن الكمية دي مستحيل معاها انى اتابع ده كله خصوصا ان الكترة دى بالتأكيد ستفرز مسلسلات غير صالحة للاستهلاك الادمي..العيادة,هاي سكول,كافيه تشينو,شريف ونص..دي أمثلة من اسماء المسلسلات اللى هاتتعرض..ده غير تامر وشوقية وراجل وست ستات في الجزء الثالث لكل منهما..بصراحة مش عارف اتابع ايه ولا ايه ومش عارف انا كتبت التدوينة دى ليه اصلا..بس حاسس ان الموضوع بقى سبوبة كبيرة قوى كعادة اى حاجة ناجحة فى مصر ومش بعيد الكم ده يأثر على نجاح الفكرة وتكون دي أول وأخر سنة نشوف فيها الكمية دى من الست كوم.

رشوان والقديس

في مدونة جديدة ومتميزة بعنوان (أنا ودماغي) قريت تدوين عن تكريم اليابان الدائم لبطل الجودو الفضي وبطل الرياضة الماسي محمد علي رشوان..وحكاية رشوان معروفة للجميع بس لا مانع لتكرارها كنوع من الفشخرة بان الراجل ده ابن بلدي..لاعب جودو مصري يصل لنهائي وزنه فى اولمبياد لوس انجيليس 84 وهو من بلد لم تذق طعم الذهب الأوليمبى منذ حوالي نصف قرن..وهيلاعب بطل العالم ياماشيتا في النهائي وفي بداية المباراة ياماشيتا يتصاب في ركبيته اليمني إصابة تخلي رشوان لو داس على رجله يعلن انسحابه او على اضعف الايمان يسيبه يشيله ويرزعه واحد ايبون يخلص بيه الذهب..لو مكانه تعمل ايه؟؟ تاخد الذهب والملايين والتكريم والشهرة والناس هتنسى قدام فرحة المكسب؟؟ ولا تختار انك تكسب احترامك لنفسك قبل احترام الناس ليك وتلعب بشرف وباخلاق الفرسان؟ رشوان اختار الشرف ولعب بشرف واتغلب بشرف ومن يومها وهو رمز للجودو في اليابان اللي هي مهد اللعبة..بيفرجوا الناشئين على الماتش ويعلموهم يعني ايه رياضة ويعنى ايه شرف واحترام..يعني ايه تختار الصح ولو على حساب الانتصار لان ده جوهر الرياضة والاخلاق..وعندنا في مصر محدش يعرف حاجة عن رشوان غير لما بيفتكروه كل اربع سنين مرة في وقت الاولمبياد ويكتبوا عنه صفحتين فى الاهرام الرياضي!!

على الجانب الاخر يقف قديس مصر الشهير بأبو تريكة وهو أفضل لاعب في مصر مهاريا وذهنيا وده شئ لا خلاف عليه ولكن..وخد بالك من لكن دي بقى..الاعلام مفيش وراه غير اخلاق ابو تريكة وتهذيب ابو تريكة وكرامات ابو تريكة اللى وصلت الموضوع ان فى ناس بتتصل به فى الحوارات التليفزيونية تطلب منه الدعاء لأولادهم..كل ده جميل لو الأمر فعلا يستحق الضجة دي (من تانى باكرر موضوع الاخلاق وليس الاداء عشان الاداء لا غبار عليه)..أبو تريكة أكتر لاعب في مصر ساعة ما الأمور تتأزم بيبدأ التمثيل على الحكام للحصول على ضربات جزاء..الموضوع شفته بعيني عشرات المرات حاضرني منهم الان الماتش الاخير امام المقاولون العرب وماتش كاس افريقيا امام السودان (والمرتين الحكم هرش وماشربش المقلب بس الحكم الافريقي اداله انذار والحكم المصري خاف!) والتمثيلية الشهيرة امام حرس الحدود فى الوقت الضائع من خارج منطقة الجزاء واللى الحكم حسبها ضربة جزاء الأهلي فاز بيها..عايز اعرف بقي على أي أساس يعامل مثل هذا الشخص على انه قديس وولي من أولياءالله الصالحين ودي أول وسيلة بيفكر فيها لما يلاقي المكسب بعيد عنه أنه يضحك على الحكم وياخد حاجة مش حقه..وخد بالك في عصر الاحتراف بتاعهم مكسب يعنى مكافأت وبطولات واعلانات وفلوس داخلة بيته وبطون ولاده..حد يرد عليا أحسن مرارتي بتتفقع كل ما اسمع بيمدحوا فيه وناسيين واحد زي رشوان اختار الاخلاق عن المكسب المشبوه

توضيح أخير لأي غبي يتهمني اني باكتب الكلام ده عشان زمالكاوي..انا فعلا زمالكاوي وممكن نختلف للصبح فى الكورة..لكن انا باشهد ان ابو تريكة احسن من كل لعيبة الزمالك فنيا..وباشهد ان الغالبية العظمي من لاعبي الزمالك عالم واطية والباقيين مش قمة فى الاحترم يعنى بشر بيصيبوا ويخطئوا..وانا باكتب على ابو تريكة تحديدا مش عشان اهلاوي ولكن عشان هو الوحيد اللى حواليه هالة اعلامية اخلاقية ملهاش علاقة بمستواه الفني..بس خلاص

رمضان..عودة موسم الكلام الممجوج!

عاد رمضان الشهر اللي منحه الاسلام عظمته وتفرده ومنحته مصر رونقا لا يشعر به الا من يقضي الشهر بها ويشهد لياليه الساحرة..ورمضان المصري يمتاز بحاجات منها القديم جدا زي الفوانيس والمسحراتي ومنها القديم شوية زي الفوازير والف ليلة ومنها الحديث زي الخيم الرمضانية وبكار..ومن ضمن الحاجات المرتبطة في ذهني وذهن الجميع برمضان في مصر والوطن العربي كله البق الحمضان بتاع (يا جماعة رمضان مش شهر مسلسلات وأكل..رمضان شهر عبادة وصلاة وقران)..البق ده بقى مش حمضان نظرا لمحتواه بالتأكيد لانه يحمل فكرة سليمة ومحترمة لكنه حمضان لكثرة التكرار اللى بتقضي على أي رأي وتخليه مجرد كلام ممجوج لا يضيف جديد ولا يؤدي لأي تأثير..يعني أنا فى ال24 سنة اللى عشتهم سمعت الكلمتين دول بتاع نص مليون مرة ..ومحدش يقولي دول بيذكروا عشان اختي اللى عندها 8 سنين لو هرشتها هتسمع البقين من غير ماحد يذكرها..كفاية رغي بقى

وبعدين يعنى ايه رمضان مش شهر اكل؟ ده حكمته الاساسية نابعة من الأكل وبيان اهميته وجعلنا نشعر بمن لا يقدر عليه..وبما ان نص المصريين والحمدلله مش لاقيينه وبيستنوا الشهر اللى ربنا بيفرجها فيه بمساعدة اهل الخير او بموائد الرحمن أو بحكمة ربنا ويلاقوا لحمة وزفر ياكلوه..ليه بقى نسم بدنهم ونحسسهم ان اللقمة هتنزل بطنهم بالسم الهاري عشان بياكلوا بدل ما يصلوا!! ارحموا الناس ربنا يرحمكم

وبعدين الدعاة والشيوخ اللى بيقولوا رمضان مش مشهر مسلسلات وزبانية الفن بيطلعوا فى رمضان يبوظوا للناس صيامهم..كأن الممثل ولا المخرج من دول بيقعد يخطط ويقول ياااه السنة دى هضرب صيام تلاتين مليون عشان اخد ابونيه لجهنم..كلام فارغ طبعا..الامر لا يعدو كون رمضان موسم بيزداد فيه الكم المعروض والاقبال عليه وبالتانى الاعلانات وبالتالى الفلوس..وهو نفس سبب انتشار البرامج الدينية على فكرة لانه موسم للشيوخ الواحد منهم ينزل يلف لفتين على الستوديوهات ويلم القرشين رزق العيال ويرجع..اشمعنى بقى الممثلين اللى الكحكة فى ايدهم عجبة؟؟..سبب الاستفزاز الرئيسي اللى خلانى اكتب الكلام انى كنت صاحى لصلاة الجمعة لقيت شيخ سعودى شكل كلب البحر لو ربى دقنه بالظبط في قناة اقرأ بيقول ان الفضائيات العربية بتسعى لنشر الفسق في رمضان عشان ممولة من قبل ساسة يهمهم نشر الفسق..صلاة النبي..طيب يا شيخنا لو فكرت هتلاقي الكلام ده منطبق عليك تماما..انت نطيت علينا بتقلك في رمضان عشان قناتك ممولها شيوخ وأمراء يهمهم فكرهم ينتشر والناس تتلهي بالدين وتنسي ظلمهم ونهبهم لأموال البترول..محسبتهاش كده ليه يا جدع قبل ما تتكلم؟؟؟

يالا مش هاطول بس كانوا كلمتين واقفين في زوري ولازم اقولهم..ولكل اللى يقرا الكلام..اتقي ربنا واعمل اللى يمليه عليك ضميرك وفكك من كلام مشايخ الدولارات..ورمضان كريم

فى احتفالية ميريت

اولا..وانا راجع فى الطريق من الاحتفال للبيت كنت متخيل انى هاكتب عن الاحتفال فى نفس اليوم مش عارف ليه الموضوع اتاجل لحد دلوقتى بس مش مهم المهم انى هاكتب اخيرا بعد صيام

ثانيا..احد اهم احلام حياتى اتحقق..فى جلسة صفا كده مع أمي قلتلها انا ممكن يجرالى حاجة لو مقابلتش أبو النجوم وقعدت معاه ولا أخفي سرا انه كان المحرك الرئيسي لحضوري الاحتفالية وظني مخابش وشفته وقعدت واتكلمت معاه وحبيته عشرين مرة قد ما كنت باحبه وربنا يخليه لينا كمان وكمان

ثالثا..الحفلة حملتلي مفاجأتين سعيدتين أولها فرقة الطمي المسرحية اللى ظلمتهم بصراحة لما جيت قبل بداية الاحتفال ولقيتهم بيستعدوا ومركزين ومتجهمين حسيت انهم شايفين نفسهم بزيادة ومكنتش متخيل الشكل اللي هيقدموه بس بصراحة طلعوا أجمل فقرات الحفل رغم ان الفقرات كان فيها عمالقة..وأبو النجوم كان جنبي وقتها قلتله ايه رايك قاللى عيال تفرح..أنا أول مرة سمعتهم كنت هاعيط..وطبعا بعد الشهادة دي مينفعش أنا اقول رأي من الأساس

رابعا..المفاجأة التانية كانت البنت الكتكوتة العسولة الأمورة الموهوبة جداااااااااا اللى اسمها دنيا مسعود..صوت وأداء وهمي وأغاني كانت محتاجة حد يدور عليها ويجمعها بدل ما تضيع..حبيت البت دي من أول نظرة وراشق في حفلتها بتاعت حديقة الازهر

خامسا..بيقولوا الغناء حرام والموسيقى حرام والشعراء يتبعهم الغاوون..طيب انا بقى من الغاوون بس للفن اللى اتقدم في الاحتفالية مش فن تامر حسني وهيثم شاكر!

سادسا..معرفش ليه مش هاقتنع ابدا بالشعر الحر ده..اصل الشعر ده نصه مزيكا اكتبى فصحى ولا عامية ولا بلغة الواق واق بس موهبتك نابعة من الفكر اولا واللغة ثانيل والمزيكا ثالثا..انا باحب محمد خير الصحفي وباقرا كل اللى بيكتبه فى الدستور..لكن مش باحب الشعر اللى بيكتبه لا هو ولا شوية الناس اللى قالوا شعر دول (بصراحة انا مش شايفه شعر اصلا دانا ممكن اكتب نفس الكلام) اللى حبيت شعره قوي فى الحفلة سالم الشهباني بجد شاعر متميز جدا وواعد جدا..كمان عجبنى رامي يحي فى القصيدة اللى فيها اقتباس لبعض ايات القران فكرة جديدة ونفذها بشكل ممتاز ولو انى خايف عليه حد من اخوانا البعدا يسمعا ويهدر دمه ولا حاجة!

سابعا..محمد علاء الدين وما ادراك ما محمد علاء الدين..الموهبة وخفة الدم الفطرية..الاراء اللاذعة واللسان الطويل..لا جديد انى من محبيه ومتابعيه..الجديد انى قابلته اثناء خروجي بعد انهاء الاحتفال واتكلمت معاه لمدة دقائق كانت كافية انى احبه زيادة..من اول اغسطس مكتبش حاجة على مدونته الرائعة ومش عارف ليه..يارب يرجع

ثامنا..خيري شلبي..نبيل عبد الفتاح..احمد العايدى..احمد مراد..عزة بلبع..طارق امام..وبشر من اللى باحب اقرالهم فى مكان واحد..كان زي الحلم وكنت فعلا محتاجة وياريت ينفع يتكرر..بس خلاص

يوسف شاهين..وداعا

جالس أمام التليفزيون أقلب القنوات في انتظار المباراة..مشغولا بالتفكير فيها..هل سيفعلها الزمالك ويفوز ولو مرة أم تستمر هيمنة القطب الأوحد..الحاكم الشمولي للكرة المصرية..اصل لقناة روتانا سينما..شريط أخبارها يكتب بمنتهى البساطة (رحل عن دنيانا المخرج العالمي يوسف شاهين ) وكأنه خبر عادي..وكأنها نتيجة مباراة أو خبر وصول الرئيس لدولة صديقة!!..يوسف شاهين مات؟؟ ببساطة؟؟..يوسف شاهين الذي لم يكن عاديا في أي يوم من أيام حياته..دخول للاستوديو لبدء تصوير فيلم لم يكن خبرا عاديا فهل موته خبر عادي؟؟!!

مات يوسف شاهين أخر عقد العباقرة في السينما المصرية واعلن الخبر في شريط الأخبار..وداعا يامن اسعدتنا يامن علمتنا كيف نفكر يامن علمتنا كيف نحب الحياة كيف نحب الحرية..وداعا يوسف شاهين.

أنا وضربة شمس ومنير

لم أكن ولا أعتقد اني سأكون في أي يوم من محبي صفحتي "ضربة شمس" في جريدتي الأثيرة "الدستور" بالرغم من الشعبية الجارفة التي تتمتع بها هذه الصفحات ورئيسها "خالد كساب" بين قراء الدستور..لا يعجبني أسلوب التحرير ولا العناوين ولا المواضيع وأشعر فيها جميعا بنوع من الاستظراف المبالغ فيه وكثيرا ما أتجاهل قراءة الصفحتين بالكامل رغم حرصي علي متابعة كل ما ينشره الدستور..

شئ واحد أحترمه في ضربة شمس بل و(أعشقها) أحيانا بسببه هو إتخاذ محرريها لمنير كرمز للصفحة وأب روحي لها..صحيح أنه من الطبيعي على كل من يقدس الحرية أن يحب منير ولكن تناول الصفحة وتغطيتها لحفلات وألبومات الملك تشعرني بقدر كبير من الفهم والتقدير لمشوار وفلسفة الموسيقي الأعظم في مصر حاليا.

اترككم مع جزء رائع ما كتبه خالد كساب عن منير في عدد الاربعاء 16 يوليو من الدستور...


"إذا فكرنا في كلمة يمكننا بها تلخيص منير كقيمة فنية فهي (حرية) ..منير هو التاريخ الرسمي لتحرر الغناء من الارتباط الشرطي غير المبرر بالبدلة والكرافتة والتقميطة اللى مالهاش لزمة والخنقة اللى بدون داعي..منير هو التاريخ الرسمي لتحرر الغناء من قوالب المواضيع الثابتة التي لاتخرج عن خانتني أو هجرتني أو أنا هجرتها وندمت..أو قفشنا على بعض وخلاص أو أنا باحبها وهي مش هارشة..منير جاء ليصحح الوضع ويؤكد أن هناك أشياء كثيرة في الحياة يمكننا أن نغني لها مثل البلاد الغريبة وهل هي عدوة ولا حبيبة..مثل الدنيا اللى مرة رايحة ومرة جاية..مثل شجر الليمون الدبلان على أرضه..مثل الكون اللى كله بيدور واحنا وياه بندور..مثل زرار القميص اللى بنفتحه للنسمة وللأماني..مثل سؤال للحبيبة على مثل هذا النسق .."امتى اتقابلنا وليه وفين..لحظة قدر ولا حنين؟"

منير هو التاريخ الرسمي لتحرر النجومية من تلك الهالة المصطنعة حولها..وتحويلها إلى نجومية من نوع آخر نجومية حقيقية قائمة على أساس انه النجم الحقيقي في مجال مثل الغناء هو الحقيقي اللى حابب الغنا اللي بيقوله واللي ما يغنيش غير لو كان حاسسها ومصدقها وحاسس إنها شبهه وهنا تكمن عظمة وقيمة الفنان الحقيقي والنجم اللي بجد..إنه يكون شبه نفسه ومنير شبه نفسه..وهنا تكمن قيمته

في عظمة أكتر من كده؟؟

نجيب سرور..عبقرية المأساة

من هو؟

محمد نجيب سرور محمد هجرس..شاعر ومؤلف وممثل ومخرج مسرحي مصري..ابن قرية (أخطاب) مركز أجا بمحافظة الدقهلية..أحد المثقفين والمبدعين الذين ذابوا عشقا في تراب مصر..ولكن للأسف لم يأخذ حقه من التقدير فلا يعرف الكثيرون الآن من هو نجيب سرور..ومن يعرفوه يتخذوا قصيدته المأسوية الشهيرة "الأميات" كنكتة لا أكثر رغم ما تحتويه من عبقرية شعرية.

حياة نجيب سرور كانت قصيرة لم تستمر أكثر من 46 سنة ولكنه قدم خلالها ما لم يستطع الكثيرون تقديمه في مئات السنين..كان عاصفة من الموهبة..كتب الشعر بالفصحى والعامية وله 9 دواوين أشهرها ديوانه العامي الممنوع من النشر وديوان "بروتوكولات حكماء ريش" اللى انتقد فيه مثقفي مصر..وألف أكثر من 15 مسرحية أشهرها "ياسين وبهية" و"منين أجيب ناس" وهي مسرحية كتبها في أسبوعين فقط أثناء احتجازه من قبل الحكومة بمستشفى الأمراض العقلية!!..بالإضافة لإخراجه 8 مسرحيات وقيامه ببطولة 4 مسرحيات أخرى وكتابته لعشرات المقالات والدراسات النقدية والأدبية اللى جعلته منه أحد أهم مثقفي ومبدعي مصر في فترة حياته القصيرة وحتى الآن.

طب ليه؟

لماذا الاحتفال والاحتفاء بنجيب سرور؟ ما البلد مليانة مبدعين!..سر تميز نجيب سرور أنه حالة فريدة ونادرة جدا من المبدعين..هو النموذج المثالي للفنان والمثقف الذي لا ينطق كلمة واحدة دون ايمان كامل بها لدرجة أن المؤرخين الأدبيين قالوا أن التطابق بين أقواله وأفكاره وأفعاله كان السبب الرئيسي في حياته الصعبة ونهايته المأسوية..نجيب عشق مصر ورفض أن يتنازل عن هذا العشق إلى أخر لحظة في عمره..جاع وتشرد وسجن واتهم بالجنون ووصل الأمر لوضعه في مستشفى الأمراض العقلية ولكنه ظل ثابتا على موقفه وايمانه بقضية الوطن..

مشاهد لا تنسى

حياة نجيب سرور بأكملها كانت أقرب لحكاية ساخرة أو مأساة إنسانية..ولكني اخترت مشهدين اعتبرتهم "مشاهد الذروة" في حكاية الشاعر المتمرد..

المشهد الأول..بعد خروجه من مستشفى الأمراض العقلية..كان مريضا بالسل ويحتاج للعلاج..ويعيش مع زوجته الروسية وولديه "شهدي وفريد" بدون مصدر دخل تقريبا..اتصل به أحد المسئولين الكبار في وزارة الإعلام وطلب مقابلته..نجيب قطع المسافة من منزله بميدان الجيزة إلى ماسبيرو مشيا ً ليوفر مصاريف المواصلات..يقابله المسئول ويطلب منه تأليف وإخراج 15 مسرحية للتلفزيون المصري مقابل خمسة آلاف جنيه للمسرحية الواحدة..بشرط أن تكون مسرحيات خفيفة موجهة لجمهور النفط..يعني شوية رقص وبنات حلوة وكام إفيه كوميدي..عرض مغري وواضح..75 ألف جنيه كافية لانتشال نجيب سرور من أزمته الصحية والمادية مقابل بيع القضية التي عاش من أجلها..نجيب رفض العرض بدون تفكير وعاد لمنزله مشيا على الأقدام من جديد..اختار أن يبيع العالم ويشتري نفسه.

المشهد الثاني..قبل وفاته بشهور وبعد انتصار أكتوبر..وجد البلد حوله تتحول لأقصى درجات الانحطاط الفكري والاجتماعي تحت مسمي (الانفتاح)..لم يتحمل أن يري البلد اللي بيذوب فيها عشقا بيحصل فيها كده..قدم مسرحية "اوكازيون" على مسرح وكالة الغوري وانتقد فيها الحكومة ولكنه شعر بان رسالته لم تصل للناس..شعر بأن خشبة المسرح لا تكفي لاحتواء موهبته الكاسحة وحبه الجارف لمصر فاتخذ أغرب قرار وأقدم على أكثر تصرفات حياته جنونا..فوجئ الناس به يقدم مشاهد مسرحيته في وسط ميدان التحرير..نجم وممثل شهير يقف في أكبر ميادين القاهرة حاملا ابنه الصغير وصائحا "ألا أونا..ألا تري..مين يشتري الورد مني؟"..مشهد مؤثر ومثير للشفقة والإعجاب في الوقت ذاته.. الإعجاب بفنان وهب حياته لوطنه والشفقة عليه مما وصل إليه بسبب تجاهل الوطن له.

قالوا عن نجيب سرور

"إن نجيب سرور ظاهرة إنسانية فريدة قلما تجود بها الأيام ، وسر هذا التفرد هو دقة التطابق بين ما يؤمن به من أفكار وما يسلكه من أفعال في عصر اتسم أصحابه بدرجات متفاوتة من الفصام بين بين ما يقولونه من أقوال وما يضمرونه من أفكار وما يسلكونه من أفعال."
عصام الدين أبو العلا – ناقد أدبي ومسرحي

"في الساعات الأولى من الخامس من يونيو 1967 حين تأكدنا من الهزيمة الساحقة ، عم الجنون الوادي وأصاب سكانه جميعا ، كل على قدر حاله ، وكلما كان صاحب النفس أكثر رهافة كلما أصابه نصيب أكبر من الجنون ، وقد كان نجيب سرور أكثر البشر الذين عرفتهم حساسية ورهافة، كما كان يحب مصر إلى حد الهوس كما لم أر في حياتي من أحب وعشق إلى هذا الحد."
عبده جبير – روائي وقاص مصري

"نجيب سرور..الشاعر والمخرج والمسرحي العظيم..أحد شهداء الكلمة في هذا الوطن العربي السعيد..الذي ظل يهيم على وجهه في شوارع القاهرة لا يجد سكنا ولا عملا..وحين مات لم يجد قبرا"
أحمد فؤاد نجم – شاعر مصري

"نجيب سرور عاقل رغم أنوفكم.. ولد عاقلا ً وموهوبا ً وعاش وجاد فنـا ً وأدبا ً وشعرا ً وقدرة خارقة على تحريض المظلومين عبر إبداعاته الفنية والأدبية وناضل من أجل مصر والمصريين والعرب ومن أجل الإنسانية عاقلا ً وعبقريا ً وصمد بتحد ٍ أمام أساليب التنكيل والإهانة في أقبيتكم وخارجها ومــات وهو عـاقل."
د.مفيد مسوح – قاص وناقد أدبي

"نجيب سرور فنان لم يدخر ضوءه, فاحترق سريعا كشهاب مرق في سمائنا, و لكنه ترك في نفسي , و في نفوس الكثيرين غيري , أثرا ساطعا لا ينسى.. لأنه أثر الموهبة المبدعة."
د.أبو بكر يوسف – طبيب وصديق نجيب سرور

ألف سلامة يا أبو النجوم

الشاعر والمناضل والمصري العظيم فى حالة حرجة بعد اصابته بجلطة دماغية..ربنا يشفيك يا ابو النجوم يا حبيبنا وبذن الله ترجعلنا اقوى من الاول وتلعلع وتشتم فى بابا اللى فوق!

6 أكتوبر الساقية..ليلة لا تنسى

اخترت ان اقضي ليلة السادس من أكتوبر هذا العام فى ساقية الصاوي خاصة بعد معرفتى بأن الاحتفال سيكون باحياء ذكري الشيخ إمام عيسى..أحد عشاق هذا الوطن وأحد أهم رواد الموسيقى الوطنية المستقلة..بالاضافة لاغاني اخرى لمبدعين من عشاق مصر..كل هذا بصوت الرائعة عزة بلبع..أغانى الشيخ إمام + أشعار احمد فؤاد نجم + صوت عزة بلبع = تركيبة لا تقاوم!

..

وبالفعل لم تخيب ظنوني وكانت بالفعل أحدي الليالي التى لاتنسى على صعيد المتعة والقيمة الفنية والوطنية من قبل مبدعين اختاروا طوال حياتهم أن يضعوا فنهم فى خدمة مصر..حضر الحفل عدد كبير من المثقفين والمبدعين على رأسهم المستشار (زكريا عبد العزيز) رئيس نادي القضاة وأحد قواد ثورة القضاء..والشاعر (زين العابدين فؤاد)..

الجزء الأول من الحفلة كان مخصصا لاغاني المبدعين فى حب مصر..فغنت عزة بلبع لسيد درويش ((شد الحزام على وسطك)) و ((اهو ده اللى صار))..ولصلاح جاهين ((ادى القدر وادى المصير))..ولبليغ حمدي ((يا حبيبتى يا مصر))..ولزين العابدين فؤاد ((اتجمعوا العشاق فى سجن القلعة))..وغنى الموهوب الشاب حسام المصري رائعة نجيب سرور ((البحر بيضحك ليه))..عاب الجزء الأول قلة التحضير الذي كان واضحا فى عدم التنسيق بين الفرقة الموسيقية والكورال وعزة بلبع..وعدم حفظ الاخيرة لكلمات بعض الأغاني..ولكنه يبقي فى المجمل ممتعا للغاية..

..

قمة الإبداع جاءت فى الجزء الثاني الذي خصص بالكامل لأشعار أحمد فؤاد نجم وأغاني الشيخ إمام..بدت عزة بلبع في قمة تألقها..كيف لا وهي تحفظ كل كلمة عن ظهر قلب وتغنيها بأحساس وإيمان غير مسبوق..غنت ((صباح الخير على الورد اللى فتح فى جناين مصر)) و ((توت حاوي توت)) و((شقع بقع)) و((بقرة حاحا)) و ((الممنوعات))..وشاركت حسام المصري فى غناء ((دولا مين ودولا مين))..وقدمت أيضا الموهبة الصغيرة ندى سيد عشماوي ذات السنوات الست والتى غنت باتقان ((فاليري جيسكار دستان)) و ((الفول واللحمة))..الجزء الثاني كان أكثر من رائع وأكثر من ممتع..انهته عزة بلبع باغنية ((بحبك يا مصر)) ليخرج الجميع مشحونين بحب هذا الوطن ومستمتعين بمستوى فني أصبح نادرا هذه الأيام..

..

كلمة أخيرة..ياريت حد من المغنيين الجداد كان تكرم واقتطع من وقته ساعتين يسمع فيهم يعني ايه غناء!!