Sunday, August 31, 2008

الوهابية في الموسيقى العربية


من أعظم القصائد في تاريخ الشعر العربي الحديث قصيدة أمير الشعراء أحمد شوقي (مضناك جفاه مرقده) واللي كتبها علي نهج قصيدة الشاعر الاندلسي الحصري القيرواني اللي مطلها بيقول..

ياليل: الصب متى غده؟؟...........أقيام الساعة موعده؟
رقد السمار فأرقــــه...............أسف للبين يردده

قصيدة القيرواني عبقرية وقصيدة شوقي عبقرية ولحن محمد عبد الوهاب للقصيدة عبقري..من الاخر هي أغنية من درر الغناء العربي..وفيها سر يخليك تستمتع بأي شخص بيغنيها عبد الوهاب - فيروز - انغام - خالد سليم..سمعتها بصوتهم واستمتعت بها جدا..

من فترة وقع في ايدي البوم غنائي من انتاج شركة بيراميدا عنوانه (سهرة مع التخت الشرقي)..اسم الالبوم شجعني وخصوصا لما قريت أسامي مجموعة الأغاني اللي فيه ولقيتها مجموعة متميزة جدا كما هو واضح في الصورة..شغلت الأغاني وسمعت أول أغنية وحسيت من طريقة الأداء ونوع التسجيل كده أنه متسجل من احدى حفلات الموسيقى العربية (ده مجرد تخمين مش أكتر)..المغني صوته وأداءه كانوا معقولين لأغنية كارم محمود (أمانة عليك ياليل طول)..قلت حلو الألبوم شكله مشجع..مقدرتش أمسك نفسي وعلى طول توجهت لأغنيتي الأثيرة (مضناك) لتبدأ المفاجأت..التسجيل أولا بدون صوت كورال وده غريب على الأغنية اللي صوت الكورس من أهم عناصرها..المغني صوته غريب جدا والأنيل أن هو والعازفين كانوا بيأدول الأغنية باستخدام تيمبو بطيء جداااا لدرجة الملل (خصوصا أن الأغنية اصلا مش سريعة عشان تسمح بكده)..لحد هنا وأنا مكبر دماغي عادي وباقول لنفسي الاغنية صعبة والقصيدة صعبة وكتر خيرهم أنهم حاولوا فيها..لحد ما حدثت اللطمة الكبري بقى اللى افقدتنى أعصابي!!

أعظم جزء من القصيدة في وجهة نظري وباعتبره من اعظم ما كتب في الحب قول شوقي:

بيني في الحب وبينك مالا......يقدر واش يفسده
ما بال العاذل يفتحلي......باب السلوان واوصده
ويقول تكاد تجن به........فأقول واوشك اعبده!

شفت العظمة؟؟ بيحب حبيبته لدرجة مش ممكن كلام الواشي أو العاذل يقلل منها..لدرجة ان اللى بيجي يضرب اسفين ويقوله دانت قربت تتجنن بيها يفاجأ برد معجز: لا انا مش بس هاتجنن بيها دانا هاعبدها!!..شعر مبهر من شاعر مبهر..ولكن...

صناع الألبوم بقي استخدموا عقلية رجل البادية ..العقلية الوهابية اللى مصرة على محاسبة الفن بالقطعة والوقوف على الكلمة ومعجبهومش قول شوقي (فاقول واوشك اعبده) فاذا بالأخ المطرب المجهول يغيرها منه لنفسه كده إلى (فاقول واوشك اعشقه)!!!

التعديل البسيط ده يحمل عدة كوارث للي يحب يفكر فيه..

أولا ده تعدي صارخ على نص من درر الشعر العربي..نص لأمير الشعراء مكتوب من سنين السنين والكل شهد بروعته..والراجل مات وساب النص..مش من حق حد يعدل فيه لفظيا ولا فكريا..دى لو اغنية كلمات بهاء الدين محمد كان لازم يستأذنوه في تغيير الكلام..مش يغيروا كلام شوقي!!!

ثانيا ده اغتيال لروعة النص وهدم للمعنى من أساسه..ودليل انهم مش فاهمين اصلا معنى الكلام..يعني ايه ويقول تكاد تجن به فاقول واشك اعشقه؟؟ ماهو طبيعي ان العشق سابق للجنون..ولا هو أى حاجة وخلاص بتتقال وكان النص الاصلى (جيتي انتى بسرعة يابنت الايه)!!

ثالثا التغيير بوظ القافية اللى ماشيه بطول القصيدة (مشتملة الابيات التى لم يلحنها عبد الوهاب) على الالف والدال..لكن بسلامته المطرب الشرعي اختار ان يخليها الف وقاف..حمار بيغني!!

رابعا وهو الاهم..ليه بقى؟ لصالح مين؟ يعنى الواحد طول عمره متعود يقولوا على الفن حرام..وعلى نزار قباني فاسق بتاع نسوان مارسيل خليفة كافربيغني قصة سيدنا يوسف ويوسف شاهين ابن جزمة بيعملها فيلم سينما..لكن كان مجرد رأي بيحاولوا يفرضوه..ليه بقى الموضوع يتحول من رأي لممارسة؟ وليه أصلا يغني القصيدة وهو شايف أن كلامها حرام؟ طيب ما يفكه منها ويغنى تمللي معاك!!..وبعدين اصلا ده واحد من انكر الاصوات بيغنى وعازفين مش فاهمين اللحن والحاجة الوحيدة الباقية كانت الكلمات..يعنى هم قدموا اغنية افسدوا كل عناصرها باقتدار الكلام واللحن والصوت والكورس!!

خلاصة الكلام انى متنرفز ومش عارف افش غلي في مين عشان الالبوم معلهوش اسم يوحد ربنا نعرف منه مصدره غير اسم المنتج (ريتشارد الحاج) ولذلك هاوجه كلامي للحاج ريتشارد..ياعم الحاج..بيقولوا الشعر حرام واني اكاد اجن به..فارد عليم واقول واوشك اعبده..وطظ في سعادتك

6 comments:

rainbow said...

اخى الكريم احمد

اولا كل عام وانت بخير ورمضان سعيد عليك يا رب

ثانيا انت مسئول مسئولية جنائية عن حالتى الآن !!0 ايون انا كمان اتنرفزت جدا
وحزينة جدا
مواضيع ان الفن حرام بكل شعبه من رسم لتصوير لموسيقى لغناء لشعر وهلم جرة
دا شىء خانق .. صحيح زى ما كتبت اللى شايف انه حرام ما يفكه منه ويغنى العنب والبطيخ

لكن اعلق اقول ايه بعد ما سمحوا لمحمد سعد واشباه البشر انهم يتريقوا ويقلدو كلام اغانى الست مثلا بكل صوت واداء منفر

احنا عايشين فى زمن المسخ فعلا .. كل شىء اصبح يوحى بالقلق منه وعليه حتى حب الاشياء وحب البشر لبعض اصبح دائما ورائه معانى اخرى مختفية

بحييك على تناولك لغضبك بأسلوب كتابة راقى

دمت اخا غاليا
وقبلها انسانا

هدى

shaw said...

الف شكر يا هدى على التعليق الجميل وانشالله احنا اخوات لحد اخر الزمان
ومتفق مع كل كلمة قلتيها

جبهة التهييس الشعبية said...

هم لسة صاحيين؟
دي اغنية من التراث
امال يعني المسلمين اللي عاصروا ابو نواس كانوا كفرة وهم دول بقى اللي مسلمين

shaw said...

دى وجهة نظرهم انهم بيبعثوا الاسلام الاولي (السلفي) اللى ضاع من بعد الخلفء الراشدين

بس هو عموما النص مش من التراث هو اللى كتبه احمد شوقى على نهج نص تراثى اندلسي

شمس النهار said...

انت زعلان علي اغنيه شوف ياسيدي
انا متخرجه من فنون جميله من 25 سنه
انت ممكن تجيب مجموع كبير تدخل طب لاكن لايمكن تدخل فنون جميله الااذا كنت موهوب
وده من عند ربنا اداك موهبة الرسم
الموفاجعه ان المفتي قال انها حرام
يعني انا فجئتا وعلي حين غره احمل بكالوريوس الحرام
ايه قولك

shaw said...

قولي هو
ربنا يرحم البلد دي بجد من ناسها