Saturday, February 28, 2009

Based On a True Story

أنا ونوح

مشهد (1) نهار/خارجي
بداخل سيارتي

أتجه بسرعة نحو القاهرة للحاق بفاعليات اليوم الأخير من ورشة الأفلامجية مرتديا بدلة رسمية بسبب تواجدي في العمل مبكرا..أقوم بتقليب الأغاني في سي دي السيارة بملل شديد محاولا العثور على شئ ملائم لمزاجي..ينطلق صوت محمد نوح في أغنيته الشهيرة (مدد مدد)..أترك الأغنية وترتسم على وجهي أبتسامة وأبدأ في التفكير.

أنا (مفكرا بصوت عالي وصوت نوح مستمر في الخلفية): طيب كان نفسي طول عمري أقابل أحمد فؤاد نجم ومحمد نوح..الحمدلله قابلت عم نجم في احتفالية ميريت..إزاي بقى ممكن أوصل لنوح؟ نفسي بس أبوس أيده وأشكره..اقوله شكرا يا مولانا..شكرا أنك موجود..شكرا على إخلاصك للمزيكا وللوطن ولكل حاجة حلوة فينا..شكرا لأني قريت كلام كتبه واحد عاصر النكسة وقال لو لم يفعل محمد نوح في حياته سوي الحفلات التى كان يجوب فيها أنحاء مصر للشحن المعنوي وتشجيع الجنود والمدنيين على الصمود والانتصار فيكفيه هذا شرفا.. شكرا لأنك اللي غنيت أجمل كلمتين اتقالوا في حب البلد دي..

صوت نوح يعلو في الخلفية: يا عقد فوق صدر الحياة...العشق جوانا صلاة

أنا (مواصلا التفكير): بس إزاي ممكن أوصله؟ المشكلة أنه مقل في الظهور جدا جدا وتقريبا معرفش أي طريقة أو أي شخص يوصلني ليه..عموما ربنا يسهل ويديه ويديني طولة العمر لحد ما أقدر أوصل لحد يعرفه...

الأغنية تنتهي..أمد يدي بكل تلقائية لأعيد سماعها من جديد

قطع
****************
مشهد (2) نهار/داخلي
داخل المركز الدولي للتنمية الثقافية

لقطات سريعة للمتدربين في الورشة يستمعون لمحاضرات عمرو سلامة ومحمد دياب..يتحدثون ويضحكون في فترات الراحة..يتبادلون أرقام التليفون وعناوين البريد الاليكتروني..ثم يلتقط الجميع صورة جماعية معلنة أنتهاء الورشة التي استمرت ثلاثة ايام.

قطع
*****************
مشهد (3) ليل/خارجي
حديقة المركز

الجميع يغادر المركز ما عدا مجموعة من المتدربين (حوالي عشرة أفراد) يبقون في الحديقة مع محمد دياب في جلسة للحديث عن امور السينما والحياة تستمر لما يقرب من الساعتين..الوقت يتأخر فيتأهب الجميع للرحيل..

أنا: أنا رايح مدينة نصر يا جماعة لو حد عاوز يجي معايا في العربية
كريم علاء (عرفته بالكاد في أيام الورشة وتحدثنا مرة أو مرتين في أحاديث عابرة): أنا رايح ياريت أجي معاك
أنا: طبعا..أنا رايح ده عند قاعة المؤتمرات
كريم: حلو جدا أنا كمان رايح أرض المعارض
انا: حظك حلو..أنا كنت مفروض أصلا أسافر طنطا حالا بس نسيت شاحن الموبايل في المكتب في مدينة نصر ولازم أروح أجيبه من هناك
كريم: طب الحمدلله

قطع
******************
مشهد (4) ليل/خارجي
بداخل سيارتي

أنا: اللي بيركبوا معايا بيستغربوا قوى المزيكا اللى باسمعها..عشان كده باريح دماغي واشغل منير..عشان ميبقالهمش حجة..

تبدأ دنيا مسعود في غناء (نوح الحمام) في السي دي

كريم: مين اللي بتغني دي؟
أنا: دي بنت أسمها دنيا مسعود..اللي كانت في فيلم جعلتنى مجرما..بنت زي العسل وصوتها جميل..وعندها مشروع إنها بتلف تجمع أغانى الفولكلور من كل المحافظات وتغنيها بلهجاتها الأصلية
كريم: كويس جدا..بس ياريت لو تعرفها قولها أن تجميع الفولكلور ده في حد عمله قبل كده بشكل كامل
أنا: حد مين؟
كريم: محمد نوح
أنا: ياراجل..انت بتحب نوح؟
كريم:طبعا

يدي تتجه بسرعة للسي دي..أعود بالتراكات للخلف بسرعة حتي أصل لأغنية (مدد مدد) فأتركها

أنا: أيه رأيك؟
كريم: المايسترو لو عرف هيفرح بيك قوى
أنا: ايه ده انت تعرفه؟
كريم: وكنت لسه معاه امبارح
أنا: معاه فين؟
كريم: في الاستوديو بتاعه في مصر الجديدة
أنا: كريم..أنا أموت وأقابل الراجل ده
كريم: عندك وقت؟ تحب نروحله دلوقتي؟
أنا: طبعااااااااااااا

كريم يجري مكالمة سريعة يستأذن المايسترو في الزيارة..نحضر الشاحن من المكتب..ونتجه مسرعين لحضرة مولانا نوح

قطع
**********************
مشهد (5) ليل/داخلي
ستوديو محمد نوح

أجلس (مبلولا) في حضرة هذا العظيم..لا اعرف كيف أتصرف..وبالطبع يضيع كل الكلام المرتب الذي كنت أتصور أني سأقوله له..كل ما قدرت أن أفعله هو ان أقبل رأسه وأخبره اني أحبه واعشق فنه..وألتقط معه الصورة الموجودة بالأعلى..استأذنته في الحضور من وقت لآخر للتمتع بالوجود معه في نفس المكان..وافق بمنتهى الحنان والرقي..اخرج من الاستوديو طائرا من السعادة بهذه المصادفات التي لو شاهدتها في أحد الأفلام لقمت بسب المؤلف الذي لا يفقه شئيا عن الواقع

النهاية

10 comments:

دونا said...

ربنا يحققلك الى نفسك فيه دايما ياشوقا

boshra mohamed said...

مكتوبالك ياعم شوقى
انا بحب كاريزمته - خصوصا لما يتكلم فى برنامج عن سيد درويش - مع انى معرفلوش اغانى خالص غير مدد وتوزيعه لاغنية عشاق الحياة بتاعة منير
.........

ياريت ياشوقى بما انك محب للمزيكا المختلفة تعملنا بوست عن اكتر الناس اللى بتحبهم ونماذج من غنائهم .. خلى الفقرا تغنى والغلبان يتنسعد

shaw said...

شدوي..ربنا يكرمك يارب
بشرى باشا..علم وينفذ يامعلم

فيونكات said...

kol elly a2dar a2olholk ya show en enta ma7zoz 3shan t2abl 7ad zay mohamed no7 wttklm m3ah
wkman bessodfa?
bgd ana mbsota 3shank w fe nafs elwa2t ba7ked 3lek
ana dina 3la fekra

shaw said...

عارف ياختى انك دينا
وهانخدك تقابليه
وعملت كومنت عندك شوفيه

sahar said...

شوقى------ماتتصورش السعادة الى حسيت بيها لما قريت كلامك دة -وفعلا اول مرة فى حياتى ابكى من كتر السعادة -لانك ببساطة اتكلمت عن احب واعظم انسان ليا فى الدنيا "اتكلمت عن ابويا "ولما الاقى انسان شاف الى انا شايفاة فى ابويا(الحنان والرقى)واحس قد اية دول اثروا فية بفرح قوى وانا لو اتكلمت عن بابا حاتكون شهادتى مجروحة بس بجد بابا دة كنز وقلب جوا عقل كل ماتعرفة اكتر كل ماتحبة اكتر واكتر :
حقيقى بشكرك وربنا يسعد قلبك قد السعادة الى اديتهالى النهاردة
وباشكر كريم جدا انة بعتلى اللينك بتاعك علشان اقراة
مليون كلمة شكر ليك ول كريم
سحر محمد نوح

shaw said...

استاذة سحر
انا بقى اللي مش عارف اقولك قد ايه نعليقك اسعدني واثلج صدري
وهاكلم كريم اشكره انه ساعدني اولا في لقاء المايسترو وثانيا في جعل (بنت القمر) تقرأ كلامي
وهابقي رخم واسألك سؤال كان نفسي أوجهه لنوارة نجم وليكي ولاستاذة مريم..ايه شعوركم يا جماعة؟ حاسين بإيه وانتوا عارفين أن والدكم شخص كل الناس بتحبه وبيحبوه لانه يستاهل الحب ده واكتر؟
اكيد حاجة متتوصفش

sahar said...

شعور حلو قوى مايتوصفش شعور بالفخر والامتنان والشكر لربنا انة ادانى نعمة بنوة الانسان الجميل دة وفى نفس الوقت شعور بالمسئولية انى شايلة على راسى واكتافى تاج من الحب والاحترام باسم راجل مشرف ومحترم وعظيم زى بابا ولازم كل تصرفاتى فى الحياة مع كل الناس تكون امتداد لية ولازم اكون قد مسئولية الاسم الكبير دة لانة اهم من كنوز الدنيا كلها صدقنى انى لغاية النهاردة كل يوم باكتشف ميزة حلوة فى بابا يمكن بابا الفنان فية جيل كبير يعرفة لكن بابا الانسان مابيعرفوش الا الى بيقرب منة بابا بجد بيحب مصر قوى بكل عيوبها وحببنا فيها بابا فى عز مجدة وعزوتة باهم ناس فى البلد عمرة ما اذى حد او قطع عيش حد او افترى على حد ولا طلب حاجة من حد وعلمنا ان الكرامة وعزة النفس اهم حاجة وان الغنى فى الاستغناء وان الانسان هو الى بيدى قيمة للشئ مش العكس دايما عندة احساس بالرضا فى كل شئ مادى لكن دايما طماع فى العلم والمعرفة والثقافة وعلشان كدة مابخلش علينا فى التعليم لاخر مرحلة بابا راجل صاحب مواقف مع الناس فى منتهى النبل والجدعنة وعمرة مابيعلن دة او يتكلم عنة علمنا نحترم ونحب الى بيشتغلوا معانا او عندنا وقبل ماياكل لازم يطمن على عمالة ياكل الى بياكلوة ولو مسافر كان بيركب اوتوبيس الفرقة والعمال ويرفض يركب عربية مخصوصة لواحدة راجل عبارة عن موسوعة علم وثقافة متحركة ومتطورة لو سالتة فى اى موضوع حاتلقية قارى فية كتب وجاهز بكل الاجابات وكل دة بمنتهى التواضع --علشان كدة انا بابا بالنسبالى قيمة كبييييييرة قوى بحبة حب البنت لابوها وبحبة واحترمة حب التلميذة الاستاذها والفنانة لمثلها الاعلي وبفرح قوى بتقدير وحب الناس لية من الفراش لرؤساء دول من البسطاء للمثقفين --انا فعلا محظوظة انى بنتة لكن انا عارفة ان بابا عندة حب وحنية وعطف يتوزع على كل الدنيا ويبقالى اخوات كتير بالمحبة زيك كدة يا شوقى واتمنى ان الاخوة دى تدوم دايما بالمحبة الى بابا ربانا بيها
اختك سحر محمد نوح

shaw said...

مش لاقي كلام أقوله بعد اللي قلتيه
ربنا يخليه لينا كلنا
أخوكي أحمد شوقي

Kontiki said...

منير ودنيا مسعود ونوح
هو دة الكلام
:)