Tuesday, May 19, 2009

أسئلة عبثية عن وفاة محمد علاء مبارك


تماشيا مع حالتي المزاجية المهببة واقترابي من ترك الشركة التي أعمل بها..وارتباطا بالظرف القاسي الذي يعانيه الرئيس مبارك وأسرته في وفاة الحفيد الأول.. خطر في بالي بعض الأسئلة العبثية التي أعلم جيدا أنه لا يوجد أجابات مقنعة لها..


أولا..ما سر التعتيم الإعلامي المصري على الخبر ليلة الأمس..يعنى وكالات الأنباء والمواقع الإخبارية تداولته تباعا ووسائل الإعلام المصري (الرائد) لا حس ولا خبر.. يا ترى الفقيد مش مهم لدرجة إهمال خبر زي ده؟ ولاّ كان عندهم تعليمات بعدم النشر؟ ولاّ هم خدوا على الإخفاء؟


ثانيا..بعد إعلان الأمر رسميا مفيش حد من وسائل إعلامنا الرشيدة حاول يعمب تقرير عن الفقيد ولا حتى يعرف تفاصيل الموضوع.. رغم إن الأمر يخصنا كمصريين بالدرجة الأولى.. وقنوات التلفزيون حاليا عبارة عن برقيات تعزية وأغاني دينية لسامي يوسف وعمرو دياب وحمادة هلال.. هل تم تعيين السيد سامي والسيد عمرو والسيد حمادة متحدثين رسميين باسم الرئاسة؟


ثالثا..ليه أساسا يتم إعلان الحداد في الإعلام وما هي الصفة الرسمية للسيد محمد علاء ليتم إعلان الحداد لوفاته؟ وبتاع إيه يتوقف إعلام دولة بالكامل يفترض أنها أهم دول المنظقة عشان وفاة طفل حتى لو كان الطفل ده حفيد الرئيس؟


رابعا..الريس والدته وشقيقه ماتوا خلال السنتين اللي فاتوا ومحصلش كل اللي بيحصل ده..هل الريس مكانش بيحبهم؟ ولاّ محمد أغلى عنده من أمه؟ ولاّ الأمر له علاقة بمستقبل الرئاسة في مصر بعد أربعين سنة مثلا؟


خامسا..تفاصيل الوفاة نفسها وأسبابها..ليه التكتم عليهم لحد دلوقتي؟ الأمر وصل لبعض الروايات الكوميدية زي أن محمد أكل أكلة مسممة بره البيت وأنه وقع من على الحصان.. هل محمد كان بينزل ياكل بره لما مامته تعمل الكوسة اللي مس بيحبها زينا كده؟ ولاّ هو كان ليه كيف ياكل من عبده تلوث مثلا؟ ولاّ الوجبة كانت معمولة خصيصا لجده وأكلها هو من باب حبه (بالوراثة) لأكل ما ليس له؟


سادسا.. ليه كل الصور الموجودة في وسائل الإعلام للفقيد ليه وهو في سن سنتين أو ثلاثة رغم أنه توفي عن عمر 12 سنة تقريبا.. هل الأمر له علاقة باستجداء تعاطف المشاهدين؟ ولاّ دي أخر صور أتصورها في حياته؟ ولاّ الإعلام معندوش رقم مؤسسة الرئاسة يتصل يطلب منهم صور حديثة؟


سابعا.. وفاة طفل فاجعة كبيرة أدعو من الله ألا يري أحدنا إياها..لكن ياترى هل وفاة مئات الأطفال يوميا من السرطان والتلوث وحوادث الطرق والاغتصاب وووو دي أمور عادية؟ وهل محمد أغلى عند ربنا من حماصة ابن عم عبده المكوجي؟ وليه التليفزيون معملش حداد لما حماصة مات؟


في أسئلة أكتر في ذهني بس هاكتفي بالشوية دول حاليا على اللع حد يعرف يديني إجابة سليمة

13 comments:

Nancy Mamdouh said...

اعز الولد ولد الولد وفاجعة كبيرة لاتستحق منا التساؤال باستهزاء بتلك الصورة
وحكاية ان والدة الرئيس توفت من سنتين مش صحيح اطلاقا واللي مات كان اخوةومتعرفش علاقتهم ازاي
لكن ده حفيدة
للموت حرمة ياريت نتكلم بطريقة احسن من كدة عليها
بالمناسبة تساؤلك ان الصور وهو عنده 5 سنين ده مش في محلة لان دي الصور اللي متوافرة عند الاعلام وبتهيئلي العيلة مش فاضيين يتواصلوا مع الاعلام ربنا يصبرهم جميعا إن شاء الله
وحكاية الكوسة بتاعت ماما دي منتهي اللامبالاة للاسف

shaw said...

معلش اصل انا واطى ومفقوع
ومعلومة على الماشي..الى بيعوز صور للريس أو اسرته مش بيتصل بالريس عالموبايل
في جهاز كامل اسمه رئاسة الجمهورية..والجهاز ده فيه قسم للعلاقات العامة والاعلام..والقسم ده بقى دي شغلته اللى بيقبض عليها فلوس

Nancy Mamdouh said...

واطي ومفقوع؟؟؟
خلاص طبيعي مدام ده الاسلوب يبقي عادي اوي ان الكلام يكون كدة

shaw said...

اسف على الرد معلش
بس انفعال طبيعي
وعموما ده تجميع لبوستات على الفيس بوك ناقشت فيها الموضوع لو عندك وقت شوفي كامل رأيي

معلش يا ياسمين كلامك من أوله لآخره مغلوط وهارد واحدة واحدة
اولا مش مفروض من رئيس جمهورية لدولة محترمة قاعد على عرشها من 28... سنة ان تصرفاته تتأثر بأي ظرف شخصي ايا كان الرظف..ده كلام مفيهوش نقاش وإلا كان ممكن يعلن الحرب بسبب حالة إمساك

ثانيا..يعنى ايه اعلام بيقول على نفسه رائد ميعرفش يتصرف في خبر نشرته كل وكالات الانباء؟ ايه وجه التصرف اصلا في نشر الخبر. وليه افضل كمصري لحد ستة الصبح اتسول الاخبار من مواقع عربية واجنبية واعلام بلدي نايم؟ اقولك ايه..لان كل واحد من رؤساء القنوات ورؤساء التحرير خايف يكون أول واحد ينشر وده ممكن يضيع كرسيه

ثالثا..المبادئ لا تتجزأ والبروتوكول لا يتغير..هو اختار قبل كده ان احداث اسرته الشخصية تبعد عن الاعلام ولازم يستمر مهما كان حجم الفقد..ومفيش حاجة اسمها دولة تعلن الحداد على حفيد رئيسها..في بروتوكول ليه مراسم وأصول..نزعل آه نعلن حداد لأ..لانه متوفي ملوش اى صفة رسمية..وجارى اللى مات اللى ابوه موظف بسيط اقرب لي وزعلت عليه لما مات اكتر من حفيد الرئيس ومطالبتش بحداد عشانه

رابعا لم اناقض نفسي..انا سألت سؤال واضح..ليه لما الخبر كان خبر منشروش؟ وليه لما بقى خبر بايت الدنيا كلها نشرتوا اكتفوا بتغطية خايبة عبارة عن قران وكليبات دينية؟ ليه بيعاملونا اننا اطفال مش من حقنا نعرف اللى بيحصل؟

خامسا..البراجراف الاخير يبرر اى حاجة..يبرر انى اتمنى هو وعيلته كلها يرحوا ف ستين داهية..يعنى موت الآلاف يوميا وتلوث الاكل والشرب والهوا وكل حاجة حوالينا والسرطان اللى بقى زى الانفلونزا ما يبررش؟ شئ غريب

اخيرا..لا شماتة فى الموت..متفقين
الولد صعبان عليا..متفقين
تصرفات الاعلام والرئاسة صح..لا طبعا
على الله يحسوا يعنى ايه حد ابنه يموت على الله يتقوا ربنا فينا

وصديق جدو ممدوح اسماعيل اللى مات اكتر من الف شخص فى العبارة بتاعته اتحكم عليه بسبع سنين
يعنى سنة لكل 130 شخص
يعنى شهر لكل 11 شخص
يعنى بتاع يومين ونص سجن على الراس!!
وكل راس من الألف دول مواطن مصري يفترض أن له نفس حقوق فقيد الأمة اللى جنازته مذاعة على الهوا...
وعجبي

هيومانتي ايه يا ياسمين؟
انا مش مختلف معاكي في ان وفاة طفل مأساة وفاجعة وربنا لا يوريها لحد فينا
بس المأساة الأكبر انها تبقى فاجعة بس عشان الطفل ده اسم جده حسني مبارك
لكن لو جده اسمه حسين ولا ابراهيم ولا مينا ولا اى حد تاني يبقى وفاته شئ عادى جدا وحدث يومي
حد يقولى كلامي صح ولا غلط؟؟ انا هاتجنن

في حاجة اسمها مقدمات ونتائج
ولو انتى من الانبياء انا الحمدلله من نبي
ولو كل يوم اصحى الصبح اضرب جارى جوز اقلام مينفعش اطلب منه يتعاطف معايا في محنتي
هو ماشاء الله عليه بيعمل فينا اكتر من جوز الاقلام
انتى من الانبياء وغفرتيله دى حاجة ترجعلك...

واذا كان من حقك انك تخالفي النتيجة المنطقية وتتعاطفي
فمن ابسط حقوقي انى افتكر ضحايا العبارة ومسرح بني سويف واقسام البوليس والاكل المسمم والقمح الفاسد والمبيدات المسرطنة والمعاش المبكر وبيع القطاع العام..من حقي افتكرهم ومن حقهم عليا أقول أن حياتهم أهم وأغلى وأطهر من أى حد حتى لو كان حفيد الريس
بس انا مش كده..ومش متعاطف..ومن حقي..وزيي كتير عاملين كومنتات وعاجبهم الكلام

khalil said...

اعز الحبايب يا ضنايا انت
هذا ردا على التعليق السابق

الغريب بجد واللى مسبب ليا لحيره بشكل شخصى جدا
ان احمد زكى "الممثل"اكثر اهميه عند الشعب المصرى من سياده الرئيس
الطفل هو طفل كأى طفل الواحد ممكن يكون متأثر بيه على الرغم انه ما يعرفوش يبقى أن طفل يموت ده شئ يحزن
لكن الحزن الاكبر أن حد يتمسك بشئ وهو عارف ان ما فيش حد بيحبه وهو فيه
النهارده بشئ من الملاحظه البسيطه "والمتابعه الغير دقيقه او الغير مرهقه" اعداد المعزيين من الناس العاديه والبسطاء تكاد تكون معدومه
وانا كصعيدى ومن الصعيد الجوانى بنعتبر أن الجنازه المهمه لا تاتى اهميتها فقط من أهميه المتوفى ولكنها ايضا تستمد قوتها كحدث من أهميه صاحب المأتم والمقصود طبعا اهل المتوفى سواء الاب او الجد او العم او الخال فما باللك وهو الرئيس نفسه فالعزاء له
اتمنى أن ينظر الى هذا المثل البسيط لعله يعلم حقيقه ما يكنه له هذا الشعب حتى انى لا أرى من انتخبه من المواطنين
هذا فضلا انهم ما كانو ليستطيعو فى مثل هذا الحدث ان يأمرو الموظفين "كالعاده" بان دفاتر الانصراف فى سرادق العزاء
وفى النهايه ربنا يسترها عليا وعليك يا ابو حميد

shaw said...

خليل بيه
واحشني اولا وواحشني قعدة التكعيبة والمشاوير لمكتبة مدبولي :)

ثانيا لو كان في امكانية للاحساس كان حصل من زمان..وان كنت اتمنى ان الحادث يحسسه شوية انه بلغ من العمر أسخفه وانها مش دايمة لحد

ثالثا ربنا يستر على ولايانا..وقال ضربوا الاعمى على عينه

عزيز عيني said...

.. انا شخصيا مش قادر اتعاطف معاهم بالمره .... ودي مش شماته بالمره

احمد بسيونى said...

اتفق معك فى كل ما قلته يا عزيزى و أضيف أيضا أن الجنازة كانت عسكرية !!! و النعش ملفوف بعلم مصر كأن الفقيد استشهد فى ميدان المعركة و لا استبعد أنه تم أطلاق 21 طلقة فى الهواء تحية له !!!!

محمود said...

سبحان الله
دى حالة وفاه مهما كانت
والمفروض نقول (انا لله وانا اليه راجعون )
يعنى انا نفسى اعرف كل اللى اتكلم هايستفاد بايه بكلامه ده سواء ايجابى او سلبى اه من حقك تتكلم بس بدون سخريه وكل واحد مسؤل عن تصرفاته فياريت نبص لنفسنا شويه ونشوف احنا عاوزين ايه ودينا عاوز منا ايه وربنا فى الاخر هايحاسب الكل

shaw said...

وعلى الكل فعل ما ينبغى لان هناك اشياء يجب ان تكون واشياء لا يمكن ان تكون
وانا وانت ورقصني يا عويس

حسين said...

الانسان اللي عنده احساس في مثل هيك مواقف بيقول انالله وانا اليه راجعون موبيهتم للتفاهات اللي بتقولهاوبعدين كل انسان واله خصوصياته وبعدين الرئيس بنفسه طلب انه مايحطوامانشتات للوفاة وتكون لأعمال خيرية هذا مش يعتبرموقف كويس ولااحنابس منبص للعيوب وبنترك الحسنات قال يعني كلك حسنات ماشاءالله نصيحة روح لدكتورنفسي

hossam said...

على فكلرة كل اللى بيشمت ده حيوان و معندوش احساس و مش بيحس بالام الناس.
انا مش بدافع عن الريس بس ربنل يصبر العيلة كلها على فقد طفل منها.
انا قرفان من كل اللى بيشمت و نفسى اضربهم ميت جزمة الحيوانات دول.

shaw said...

تشكر يا محترم